لوليتا

هل تذكر اللوليتا ؟ ليست برائحة غزل البنات النفاذة ، و لا ببرودة الآيس كريم المنعشة ، و لا يبقى طعمها في فمك طويلاً كالبونبوني و الشيكولاتة . ما هي إلا متعة وقتية تأكلها في ثانية ، و تنسى كل شئ عنها في الثانية التالية !!0

الخميس، سبتمبر 21، 2006

أغاني توجع القلب

ساعات في أغاني معينة بتلعب على وتر مشاعرك
تحس إنها أنت
إنها بتتغنى لك أنت بالذات
إنها بتلخص حياتك في كلمتين
إنها بتوجعك أوي
ولأن الإنسان أناني في أغلب الأحيان إلا أن الحاجة الوحيدة اللي بيحب الناس تشاركه فيها هي أحزانه
وبما إن قلبي واجعني أوي من الأغنية دي ، فحبيت أسمعهالكوا وأوجع قلبكوا معايا
:) :)
بنلف في دواير
والدنيا تلف بينا
دايما ننتهى
لمطرح ما ابتدينا
طيور الفجر تايهة
في عتمة المدينة
بتدور
0
مبنكتبش الرسايل
مبننتظرش رد
لا حد في يوم سمعنا
ولا بنسمع حد
طيور العمر تايهة
في عتمة المدينة
بتدور
0
ساكنين في عالم يعشق الخطر
فيه الطيور تهرب من الشجر
وتهرب النجوم من القمر
وتهرب الوجوه من الصور
بنلف في دواير ندور ع الامان
ونلاقينا رجعنا تاني لنفس المكان
ندور
0
نحلم و نحلم بالحياة المفرحة
واتاري احلامنا بلا اجنحة
ندور ندور ندور
بجناح حزين مكسور
ساعات نشوف في العتمة
وساعات نتوه في النور

ساعات عيونا بالاسى تفرح
وساعات في ساعة الفرح منوحة

الاثنين، سبتمبر 11، 2006

كل سنة وأنا طيبة :)

لحظاتي الأولى في عامي السابع و العشرين

لن أكرر ذات الكلمات التى تقال في هذه المناسبات ، و التي عادة ما تكون كئيبة

فقط أردت تسجيل أمتناني العميق لكل من تذكرني في هذا اليوم - و معظمهم تذكروا من نشرات الاخبار التي تعلن عن ذكرى ضربات الحادي عشر من سبتمبر لابراج التجارة العالمية - و كل من اخبرني انه ( كل سنة وأنت طيبة )

و تسجيل تفهمي الكامل لمن لم يتذكر ، انا نفسي لا اتذكر اعياد ميلاد اصدقائي :) 0

ايه الكلام الفاضي اللي انا بكتبه ده ؟؟؟؟؟

ما علينا

النهاردة - 11 سبتمبر - عيد ميلادي ال 26 0

والحمدلله ، انا - على غير العادة - مبسوطة و مش مكتئبة

يمكن ساعات كتير بحس اني عجزت اوييييييي وان عمري يجي خمسين سنة

لكن ساعات اكتر بحس اني لسة طفلة ، بتلعب في لحظتها الحالية مع انعدام كامل في تصورها لبكرة و فقدان تام للقدرة على تحمل اي مسؤولية في الدنيا

عادة في المناسبات دي الناس العاقلة - او اللي عايزة تعمل عاقلة - تقولك انا مسكت ورقة و قلم و حاسبت نفسي على ال26 سنة اللي فاتوا

عملت فيهم ايه حلو و ايه وحش !!!!!!!!!!!!0

طبعا ياعم دماغك ، بلا حلو بلا وحش

اللي عدى عدى وكل سنة و أنت طيب :) المهم اني طول سنيني ال26 معملتش حاجة ندمت عليها بعد كده ، حتى لو كانت غلط ، بابقى مقتنعة اني عملتها لان ده انا ، ولو رجعت لورا هعمل نفس اللي عملته اكيد 0

طبعا، لو تخيلنا اني بعمل حوار مع نفسي ، هيكون لازم اسألها السؤال الغبي أياه

ايه هي احلامك اللي حققتيها في ال26 سنة اللي فاتوا و ايه هي احلامك اللي لسة عايزة تحققيها 00

لو اعتبرنا البلوج ده - كمساحة اعبر فيها عن نفسي واكتب اللي عايزه اكتبه وقت ما احب اكتبه - حلم ، يبقى اتحقق

لو اعتبرنا انك تفضل مع اعز اعز اصدقائك و يفضلوا جنبك بعد العمر ده كله ، حلم ، يبقى انا حققته

لو اعتبرنا انك تحب الناس و الناس تحبك - الحمدلله - حلم يبقى انا حققته

اظن انه مش بطال في 26 سنة :)

وكل سنة وانا طيبة ; )

الاثنين، سبتمبر 04، 2006

لماذا ذهبت نجوم إف إم إلى ( لا بلاج العجمي ) و شواطئ ( مارينا ) و لم تذهب لجمصة أو رأس البر ؟؟؟!!!!!!0

حتى نجوم إف إم مفيهاش مكان للغلابة 000

أعترف - و ياخجلي من الاعتراف - إني أحب الاستماع في بعض الأحيان لمحطة نجوم إف إم ، رغم تفاهتها أحياناً . إلا إنني أتصيد الأغنيات من بين كم الأعلانات و الاستظراف الرهيب . و كثيراً ما تتحرك يدي تلقائياً لتدير مؤشر الردايو ليذهب إلى 105.8 إف إم ، إذاعة الأغاني الحبيبة بأغنياتها القديمة و بالها الرايق0

جذب إنتباهي منذ بداية الصيف أن نجوم إف إم تعلن عن برنامج صيفي سيكون من على الشواطئ مباشرة 0( هنكون معاك ع البحر ، و هنلف شواطئ مصر )0
مما جعلني أتخيل أن مذيعي المحطة يعلنون عن برنامج منظم للدوران على جميع شواطئ مصر ، جمصة ، رأس البر ، ميامي ، العجمي ، المعمورة ، الساحل الشمالي ، مارينا ، فايد ، الاسماعيلية ، بورسعيد 0
0
إلا أن الإعلان آتى ليعلن أنه لا مكان للغلابة أمثالنا حتى على محطات الراديو 0
فالمذيع يعلن بثقة أن البرنامج سيبث مباشرة من لا بلاج العجمي ، و عدة شواطئ بمارينا لن أتذكر اسمائها ولو بعد مائة عام 0
0
قد يبرر البعض كلامي هذا على أنه حقد طبقي أو حسد أو أنني أفش غللي في من حققوا معجزة التصييف في الكوكب المسمى الساحل الشمالي أو لأحد شواطئ مارينا التي لن أسنطيع تذكر اسمائها ولو بعد مائة عام 0
وحتى لا تتعبوا أنفسكم في الاستنتاج ، نعم هو حقد طبقي لا شك في ذلك 0
0
فأبي بعد 36 عاماً من خدمة الحكومة لم يستطع أن يوفر لي أسبوع مصيف في شرم الشيخ أو الغردقة أو الساحل
الشمالي أو أحد شواطئ مارينا التي لن أستطيع تذكر اسمائها ولو بعد مائة عام 0 ربما لأنه لم يمتلك الشجاعة الكافية لأن يكون لصاً أو مرتشياً 00
0
و على الرغم من الحقد و الغل إلا أنني أحمد الله على أسبوع جمصة الذي أقضيه كل عام ، ربما لعلمي أن أغلب الشعب المصري لا يعرف معنى التصييف و بعضهم لم ير البحر أصلاً 0
0
و لك أن تتصور غيظي من المحطة و البرنامج و المذيعين في كل حلقة من حلقات البرنامج الذي يقدم كل ( ويك إند ) 0 و إمعاناً في غيظك تخبرك المذيعة كل خمس ثوان أن ( المية هنا تجنن يا جماعة ولون البحر مش ممكن و الجو تحفة بجد ) !!!!00
لماذا يا أبي لم تستطع أن تكون لصاً أو مرتشياً أو راكباً لأي موجة توصلك إلى أحد شواطئ مارينا التي لن أستطيع تذكر اسمائها ولو بعد مائة عام 000