لوليتا

هل تذكر اللوليتا ؟ ليست برائحة غزل البنات النفاذة ، و لا ببرودة الآيس كريم المنعشة ، و لا يبقى طعمها في فمك طويلاً كالبونبوني و الشيكولاتة . ما هي إلا متعة وقتية تأكلها في ثانية ، و تنسى كل شئ عنها في الثانية التالية !!0

الاثنين، سبتمبر 11، 2006

كل سنة وأنا طيبة :)

لحظاتي الأولى في عامي السابع و العشرين

لن أكرر ذات الكلمات التى تقال في هذه المناسبات ، و التي عادة ما تكون كئيبة

فقط أردت تسجيل أمتناني العميق لكل من تذكرني في هذا اليوم - و معظمهم تذكروا من نشرات الاخبار التي تعلن عن ذكرى ضربات الحادي عشر من سبتمبر لابراج التجارة العالمية - و كل من اخبرني انه ( كل سنة وأنت طيبة )

و تسجيل تفهمي الكامل لمن لم يتذكر ، انا نفسي لا اتذكر اعياد ميلاد اصدقائي :) 0

ايه الكلام الفاضي اللي انا بكتبه ده ؟؟؟؟؟

ما علينا

النهاردة - 11 سبتمبر - عيد ميلادي ال 26 0

والحمدلله ، انا - على غير العادة - مبسوطة و مش مكتئبة

يمكن ساعات كتير بحس اني عجزت اوييييييي وان عمري يجي خمسين سنة

لكن ساعات اكتر بحس اني لسة طفلة ، بتلعب في لحظتها الحالية مع انعدام كامل في تصورها لبكرة و فقدان تام للقدرة على تحمل اي مسؤولية في الدنيا

عادة في المناسبات دي الناس العاقلة - او اللي عايزة تعمل عاقلة - تقولك انا مسكت ورقة و قلم و حاسبت نفسي على ال26 سنة اللي فاتوا

عملت فيهم ايه حلو و ايه وحش !!!!!!!!!!!!0

طبعا ياعم دماغك ، بلا حلو بلا وحش

اللي عدى عدى وكل سنة و أنت طيب :) المهم اني طول سنيني ال26 معملتش حاجة ندمت عليها بعد كده ، حتى لو كانت غلط ، بابقى مقتنعة اني عملتها لان ده انا ، ولو رجعت لورا هعمل نفس اللي عملته اكيد 0

طبعا، لو تخيلنا اني بعمل حوار مع نفسي ، هيكون لازم اسألها السؤال الغبي أياه

ايه هي احلامك اللي حققتيها في ال26 سنة اللي فاتوا و ايه هي احلامك اللي لسة عايزة تحققيها 00

لو اعتبرنا البلوج ده - كمساحة اعبر فيها عن نفسي واكتب اللي عايزه اكتبه وقت ما احب اكتبه - حلم ، يبقى اتحقق

لو اعتبرنا انك تفضل مع اعز اعز اصدقائك و يفضلوا جنبك بعد العمر ده كله ، حلم ، يبقى انا حققته

لو اعتبرنا انك تحب الناس و الناس تحبك - الحمدلله - حلم يبقى انا حققته

اظن انه مش بطال في 26 سنة :)

وكل سنة وانا طيبة ; )

18 Comments:

At سبتمبر 11, 2006 7:41 ص, Blogger ايــــــــــــــــــوب said...

حبيت بس اكون اول واحد يقولك هنا كل سنة وانتى طيبة

 
At سبتمبر 11, 2006 11:32 ص, Anonymous غير معرف said...

كل سنة و انت طيبة, انا كمان عيدميلادى النهاردة, تفتكرى ممكن يسمحولنا بدخول امريكا فى يوم من الايام :)

 
At سبتمبر 11, 2006 3:45 م, Blogger shaimaa said...

كل سنه وانتي طيبه يا ايميي

ويارب السنه دي نشوف كتاب من اوله لاخره تاليف العبقرينو اميره حسين

 
At سبتمبر 11, 2006 5:33 م, Anonymous تامر فتحي said...

متأخرة شويتين ثلاثة أربعة

كل سنة وانتِ بكل خير يا ستي

وعقبال - مش مليون سنة لأني مش باكلم جرم كوني - ما تروق الغزالة علشان نشتغل بمزاج، وأظن فاهمناني ؛)


تامر

 
At سبتمبر 12, 2006 12:09 ص, Blogger أميرة حسين said...

ايوب :)
كل سنة و انت طيب يا جميل :)

Anonymous
انت كمان عيد ميلادك النهاردة D: ؟
انا كنت فاكرة اني النحس الوحيد في العالم ، وأكيد أكيد مش هيدخلونا امريكا ، هما اول ما يبصوا في البسبور و يشوفوا تاريخ الميلاد هيدخلونا جوانتنامو D:

شيمو
وانت بالف خير يا قمر ربنا يخليك يا جميل ، اما بالنسبة لموضوع الكتاب ده ، فربك يسهلها :)

تيمووووووووووووووو
سايكو العزيز ، انت فين يا عم ؟؟ واحشني بجد جدا جدا جدا
كل سنة وانت طيب يا تامر و ميرسي خالص خالص على الطلة الجميلة دي :)

اما بالنسبة للشغل بقى - احم - انت عارف ان الادباء العباقرة كلهم بيكون انتاجهم قليل ( مشيها قليل وبلاش حد يتفلحس و يطلع يقولي بالعكس ده بيكونوا غزيري الانتاج )
وبما اني اديب عبقري ، فانا قاعد مستنى الوحي D: اول ما يجي هبعت اي عيل صغير يقولك ، متقلقش .

 
At سبتمبر 12, 2006 5:54 ص, Blogger SnipER said...

كل سنة وانتي طيبة يافندم وعقبال ترليون سنه (بنكلم شمس مش جرم كوني:P
بس صحيح ايه تاريخ الميلاد الرهيب ده؟

 
At سبتمبر 12, 2006 5:53 م, Blogger 3mr youssef said...

كل سنة وانتي طيبة واوعدك ان مفيش حد هينسي عيد ميلادك لأنه عيد ميلاد تهتز له الأرض

 
At سبتمبر 12, 2006 10:03 م, Blogger أميرة حسين said...

SnipER
وانت طيب يا جميل و ربنا يخليك على الترليون سنة دول :D
اما تاريخ الميلاد بقى فخليها في سرك ليفتكروني تبع القاعدة :)

عمرو يوسف
وانت طيب يا عمرو و ربنا يخليك
اكيد محدش هينسى و اللي هينسى النشرة هتفكره
:D

 
At سبتمبر 13, 2006 2:41 ص, Blogger كازانوفا said...

كل سنة وانتى طيبة يا اميرة وعيدك بقى عيدين عيد البرجين لما اضربوا ويمو متولدت يا بختك بصراحة هبتدى احقد عليكى ههههههه

 
At سبتمبر 14, 2006 12:35 ص, Blogger أميرة حسين said...

وانت طيب يا كازانوفا :)
انما مين قال ان يوم ضرب البرجين ده عيد
ده كان يوم اسود ياعم

عقبال عيد ميلادك كده لما يوافق كارثة عالمية عشان تبطل تحقد على خلق الله
:D

 
At سبتمبر 14, 2006 1:21 م, Anonymous Ehab said...

kol sana w enty tayeba
w 3o2bal 100000000 sana lol
ur blog gameel moot w ana 3awez ra2yek w mosa3detek fe elblog bta3y
http://beboahlawy.blogspot.com/

thxx

 
At سبتمبر 14, 2006 11:36 م, Blogger أميرة حسين said...

وانت طيب يا ايهاب
ميرسي يا جميل :)

البلوج بتاعك جميل يا ايهاب
لكن اعتقادي انا عن البلوج انه لازم يكون شخصي شوية
يعني معظم اللي انت كاتبه اخبار سواء رياضية او سياسية
لكن مفيش مثلا رأي ليك او حاجة عن نفسك او لو بتكتب ، كتابات ليك
على العموم انت لسة بادئ و ان شاء الله انا هاتابع البلوج بتاعك دايما و هستنى اعرف عنك اكتر من البلوج :)
ولو محتاج اي مساعدة ابعتلي على الايميل اللي انا حاطاه على البلوج هنا

 
At سبتمبر 16, 2006 3:48 م, Blogger BeboOo said...

ميرسى يا اميرة على اهتمامك
بس انا حاولت ابدأ بالحاجات دى يعنى بدرب ايدى على الكتابه لانى من فترة طويلة مكتبتش
وانا بعتلك على الايميل رساله يا ريت تشوفيها وتردى عليا
وميرسى مرة تانية
ومستنى مقالك الجاى

 
At سبتمبر 20, 2006 2:58 م, Blogger Shower-Mirror said...

كل سنه و ناتى طيبه ياقمر ...وانشاءالله اللى جاى احسن .. ( بقيتى مشهوره ياعم و البلوج اللى فات اتنشر فى الدستور :) ) ....

تشاو .... ابقى هاتى اصحابك و تعالى زورونى ....

 
At سبتمبر 20, 2006 3:31 م, Blogger Shower-Mirror said...

اسمحيلى بس اختلف معاكى فى حاجه قلتيها فى البوست اللى فات .....الاول احب اقول انى معترض زيك بالظبط ان البرنامج اتعمل لبلاجات الساحل الشمالى بس و نسيوا بقيت خلق الله اللى بيصفوا فى باقى الشواطئ .. و دى طبعا حاجه سخيفه جدا و انتى عندك حق ...و لكن - اسمحيلى - انا معترض على التعميم المطلق ان كل اللى بيصيفوا فى مارينا مرتشيين و حراميه و كل اللى بيصيف فى جمصه و بلطيم شرفاء و اطهار ...طبعا ده كلام مش سليم ..بس للأسف ده نتيجه الاعلام المصرى المحترم اللى صور للناس ان كل الاغنيا حراميه وولاد كلب ..و الفقرا هما ابطال الافلام الشرفاء ... عزيزتى اميره انا و عيلتى كنا بنصيف فى احسن حتت فى مصر طول عمرنا ابتداءا من المعموره زمان ..و لغاية مارينا دلوقتى ... و الدى كان محاسب فى مصر زمان و سافر للخليج فى السبعينات و بعد ماطلعت روح اللى جابوه رجع مصر و عمل مشروع صغير و محترم بيشتغل فيه حوالى 100 عامل ( يعنى 100 بيت مفتوح ) .. يعنى لاهو حرامى ولا فاسد ولا مرتشى .... و كان كل همه فى الحياه اننا نتعلم كويس ..وده اللى حصل انى اتعلمت تعليم محترم -دون ان نكلف دولة الغلابه مليم احمر - و ده مكننى انى اشتغل فى احد البنوك الاجنبيه فى مصر بمرتب مرتفع - والله العظيم بدون واسطه بأمكانياتى فقط _ ده بجانب شغلى مع والدى .. وطبعا اى انسان بيفهم هايكون عارف الشغل فى مكان زى كده متعب اد ايه ( حوالى 11 ساعه يوميا بالاضافه الى الشغل الخاص ) ...و ده اللى خلانى الحمد لله اقدر انى اصيف انا و عيلتى الصغيره بعد ماتجوزت فى نفس الاماكن ... -اقصد بلاجات مارينا اللى مش عارفه اسمها زى ماقولتى - .. و انا لا اعتقد -طبعا - انى مرتشى او حرامى او فاسد ....و لكن المسأله مسألة امكانيات و الحكايه نسبه و تناسب ..يعنى مثلا فى ناس عمرها ماراحت مصيف اصلا ..لما يشوفوا الناس اللى بتصيف فى جمصه هايقولوا يابختهم او هايقولوا اكيد دول حراميه ...!
اسف على التطويل ولكننى اعتقد ان الاسطوانات المشروخه بتاعة الغنى الحرامى و الفقير المجتهد دى خلصت من زمان .. كل مستوى فيه من ده و من ده .. ياعزيزتى الملائكه مش موجوده على الارض وان وجدت لن تكون فى مصر ..

اسف جدا على تضييع وقتك و سعيد بمعرفتك

 
At سبتمبر 21, 2006 2:28 ص, Blogger أميرة حسين said...

Shower-Mirror
أولا شكرااااا خالص على تعليقك و على ردك الجميل :) :)

ثانيا : معتقدش اني قلت اي حاجة في البوست بتاعي تقول ان كل الاغنيا حرامية او كل الفقراء شرفاء
انا كل اللي قلته ان ابويا بعد خدمة 36 سنة في الحكومة معرفش يوديني مارينا او الساحل :)

وقلت كمان اني مش من اللي حققوا معجزة التصييف في الساحل الشمالي
لكن مقلتش ابدا ان كل اللي بيروح الساحل او مارينا حرامية :) :)
لكن قلت - من باب الفخر واعترف بده - ان ابويا معرفش يكون حرامي او مرتشي

فمتزعلش اوي كده :) بالعكس مصر فيها ناس عصاميين بالفعل ، لكن انت متفق معايا برضه انهم قله
لان تحقيق ده في الظروف اللي البلد فيها و المحافظة على مبادئك و اخلاقك في نفس الوقت عملية صعبة جدا لكن مش مستحيلة بالتأكيد

تحياتي ليك و لوالدك و يارب يكتر من أمثالكم :) :) سعيدة جدا جدا جدا بمعرفتك

 
At سبتمبر 21, 2006 9:23 ص, Blogger Shower-Mirror said...

بصراحه انا كنت منتظر رد هجومى شويه ..! لكن انا طلعت غلطان ..انا هاقرا البوست بتاعك تانى و لكن بمفهوم جديد ...:) و انا متفق معاكى تماما على ان تكوين النفس مع الحفاظ على المبادئ شئ صعب اليومين دول ...

مبسوط خالص بيكى و بمعرفتك ... و ابقى شرفينى علطول

 
At يونيو 27, 2007 10:04 م, Blogger Actos said...

nice post, it's really interesting for me today, thx

 

إرسال تعليق

Links to this post:

إنشاء رابط

<< Home