لوليتا

هل تذكر اللوليتا ؟ ليست برائحة غزل البنات النفاذة ، و لا ببرودة الآيس كريم المنعشة ، و لا يبقى طعمها في فمك طويلاً كالبونبوني و الشيكولاتة . ما هي إلا متعة وقتية تأكلها في ثانية ، و تنسى كل شئ عنها في الثانية التالية !!0

الخميس، نوفمبر 02، 2006

المصريين أهما

لو لم أكن مصرياً لوددت أن (لا) أكون مصرياً


في البداية أحب أن أعتذر عن لهجتي هذه المرة ، ربما يراها البعض حادة و ربما يراها البعض الأخر خروج عن حدود الأدب و ربما متشائمة أو منفعلة0
فقط لم أستطع كبح جماح نفسي و لم أستطع الكتابة بلهجة أقل حدة ، منفعلة تماما منذ صباح اليوم ، أكاد أكل بعضي حرفيا 000
سنوات طويلة و نحن نفاخر و نتفاخر بأننا مصريين ، نردد كالببغاوات لو لم أكن مصرياً لوددت أن أكون مصرياً ، تلك المقولة التي لو كان مصطفى باشا كامل يعيش بيننا هذه الأيام لقتل نفسه رمياً بالرصاص في ميدان عام قبل أن ينطقها0
0
أهؤلاء هم المصريون الذين يكافح الشرفاء من أجلهم و من أجل إنقاذهم من براثن المحتل الوطني الذي يكبس على
أنفاسهم منذ ربع قرن خلا و سيكمل الورثة رحلته لقرون قادمة ؟؟!!!!0
0
بالطبع يعرف أغلبكم الآن الأحداث البشعة التي حدثت في أكبر ميادين و شوارع القاهرة أول أيام عيد الفطر
وهي - باختصار متعمد لأنني أحاول أبعاد التفاصيل عن ذهني علني أهدئ قليلا - تحرش مئات من الشباب بالفتيات في شارع طلعت حرب بوسط البلد وصلت لحد تمزيق ملابسهن بالكامل و استمرت المهزلة أربع ساعات كاملة دون أن يظهر رجل شرطة واحد 00
ربما تدخل بعض أصحاب المحلات و العاملين بها لإنقاذ الفتيات ، بالتعاون مع بعض المارة ، إلا أن أكثر المارة غادر الشارع مسرعاً و قال يا فكيك !!!!0
0
أين رجال الشرطة في أول أيام العيد حيث يجب أن يكون الوجود الأمني مكثف في الشوارع و الأماكن المزدحمة !! هذه
ليست شوارع جانبية و لا مناطق مقطوعة ! هذا أكبر ميادين القاهرة و أكثر شوارعها حيوية و ازدحاما !0
0
إيه؟؟ البوليس مأجز في العيد ؟؟ والله اللي أعرفه أنك عايز تعيد عند أمك يبقى على رأي محمود المليجي تقلع البدلة و تلبس بينش . اخلع الكام دبورة اللي على كتفك اللي بتتمنظر بيهم على خلق الله و روح اشتغل أي شغلانة تانية و هوبص في العيد على راحتك !!!0
اشمعنى لما بتبقى مظاهرة في وسط البلد و في نفس الشارع تحديدا اللي يشهد على ضرب و سحل و بهدلة المتظاهرين و أي نفر يجيبه حظه المهبب في الشارع يوم مظاهرة إن شالله يكون نازل يشتري جزمة !!!0
0
ثم بعيدا عن لماذا لم تمنع الشرطة ما حدث ، أرجو أن يشرح لي أحدكم ( لماذا حدث ) ؟؟!!!!!!0
هذا ليس أول عيد و ليست أول مرة تعرض أفلام للمرة الأولى أول أيام العيد فيحدث زحام شديد ! 0
0
نعم أنا أعلم جيدا أن التحرشات تكثر في الزحام ، و أكثرنا تعرضت لمرة واحدة على الأقل للتحرش بالقول أو بالفعل ، أصبح شيئاً عاديا نتوقعه كلما مشينا في شارع وحدنا 00
ولكن المتحرش عادة ما يكون جبان ، يفعلها و كأنه لا يقصد أو يرمي الكلمة و يجري !!! 0
0
حد يفهمني يا جماعة ايه اللي حصل و حصل ازاي ؟؟
0
لا يعقل أن يكون مئات من الشباب تحت تأثر المخدرات مثلا لنتحجج بهذا أمام أنفسنا و لنعطيها الأمان لنستطيع الخروج من بيوتنا مرة أخرى ! 0
0
كما أن المبرر التقليدي لدى الباحثين الاجتماعيين و علماء النفس - اللذين لن يكفوا عن إيجاد أسباب و مبررات لما حدث - وهو الفقر و الجهل و تأخر سن الزواج بسبب الظروف الاقتصادية ، لن يصلح هنا أيضاً لأنه حتى لو افترضنا جدلا أن مئات الشباب اللذين لا تربط بينهم أي صلة لهم نفس الظروف فتلك الظروف لم تكن أبداً مبررا للانحطاط و السفالة و الوصول لدرجة يعف عنها الحيوان من التدني و الوساخة ( عمرك سمعت عن طور اغتصب بقرة ؟ كلب تحرش بكلبة و عاشرها غصب عنها ؟؟ ) .. لم يكن الفقر أبداً مبرراً للانحراف . أغلب عظماء العالم من علماء و أدباء و شيوخ و ثوريين و مناضلين كانوا من الفقراء و بعضهم حتى لم يكمل تعليمه كالعقاد مثلا000
0
ومش عايزة واحد يجي هنا يتفلحس و يقولي العيب ع البنات اللي خارجة لوحدها ولا اللي لابسة ضيق و قصير ، انا مش ناقصة استفزاز و اللي هيقولي كده مضمنش هارد عليه ازاي !!0
0
دعك من أن معظم الفتيات اللاتي تم التحرش بهن كن محجبات بالفعل ، لأنه حتى لو لم يكن كذلك ، في أي دين أو شريعة أو أخلاق أو عرف أو تقاليد يمزق للفتاة ملابسها و يتم التحرش بها من عشرات الشباب في الشارع !!!0
0
بأي حق يلقي شاب عابث بكلمة قبيحة على أسماعها غير مدرك أي أذي نفسي ستسببه هذه الكلمة !! 0
0
و ما استفزني أكثر أن جريدة الأهرام نشرت الخبر مع التأكيد على أنه حادثة فردية هولتها الشائعات ، مع استطلاع رأي في نفس عدد اليوم عن رأي الشباب في أسباب الاغتصاب و التحرش الجنسي ، فما كان من الأغلبية ? حسب استفتاء الأهرام ? إلا أن حملوا الفتيات الذنب كله !!!!!!!! 0
0
معظمهم قال أن الملابس و المظهر و طريقة الكلام و المشي هي التي تستفز الشاب !!! فإن أفترضنا أن الحجاب يمنع المضايقات - وهو لا يفعل - فلماذا تطالب الفتاة بالالتزام بتعاليم دينها و لا تلتزم أنت بها ؟؟؟!! دينك يحضك على غض البصر !!! يعني اللي بيطلع يتسنكح على النواصي و يقولك البنات هي اللي لابسة ضيق ، تعرف أن بروح أهلك أنت اللي تلم نفسك مش هي ، ربنا زي ما أمرها تتحجب أمرك لو شفتها لابسة بكيني في الشارع تبص في الأرض !!!0
0
ماذا تبقى إذن من هذا البلد ؟؟ إذا كنا نصرخ بأنها ( حكومة بنت كلب وسخة ) و اللي حاكمينها سارقينها و ننتظر و نحلم بالثورة !! فمن سيثور ؟؟ هؤلاء الشباب !! 0
0
وإذا كان النظام وصل لأقصى حدود البجاحة و الصفاقة و الفتونة و البلطجة ، و إذا كان كل معارض جرئ او صحفي شريف تلفق له التهم و يلقى خلف القضبان بداية بأيمن نور و مرورا بوائل الإبراشي و إبراهيم عيسى و انتهاءً بطلعت السادات والبقية تأتى ، و إذا كنا نتسمم كل يوم بطعام مسرطن و مياة ملوثة و فراخ بالانفلونزا و لحمة بالحمى القلاعية ، و نهر النيل اللي هريناه أغاني بقى مصرف مجاري و أحنا بنشرب ! و شكلنا هنفضل نشرب كتير . يبقى
فاضل إيه غير الناس ؟؟؟
0
و أدي الناس اهه !! المصريين أهما 000
0
بدأت أصدق أن هذا الشعب يستحق كل ما يجري له و ما سيجري له ، إن لم يكن يستحقه لأفعاله فهو يستحقه بلامبالاته و سلبيته و غض بصره حتى عن عرضه ينتهك وسط الشوارع 00
لماذا نغضب إذن عندما يصف بعض مواطنو البلاد العربية المصري بأنه (قرني) ، و أنه سيسهل لك الوصول للحريم بأي مقابل مهما كان بخساً ؟؟؟
لماذا نغضب عندما يهان الإسلام على يد الدول الغربية بينما الإسلام يداس بالأقدام و يطمس بصراخ الفتيات و ما من نخوة و لا عزة و لا كرامة !!0
0
ماذا تبقى بعد كل هذا ؟؟
0
الخلاصة ؟؟؟ بلد وسخة و اللي يعرف يهج منها و يغير جنسيته - حتى لو اشتغل خدام - يكون أكرم له 0
-----------------------------------------------------------------------
شهود على المهزلة
0

48 Comments:

At نوفمبر 02, 2006 12:48 م, Blogger free soul said...

البلد وسخة بأهلها

لو عايزة تعيشى حياة كريمة مش هتكون غير فيها, الحل انك متسكوتيش و تغيريها, خليها زى ما انتى عايزة ولادك يعيشوا فيها

believe me you won't feel comfortable anywhere else, and if you run away you will loose the only home you ever had

 
At نوفمبر 02, 2006 11:29 م, Blogger Khaled Khalil said...

الموضوع مش مسألة مصري من خلافه, أنا مش فاهم أصلاً ايه اللي حصل
طيب, عرفت, ازاي, متفقين يعني ؟ مش ممكن
مش لاقي أي تفسير
أنا دايماً كنت عارف إن مش ممكن لأي بنت انها تتخيل ازاي الولاد بيفكروا في حاجات زي دي, و بيفتكرو المعاكسة هزار و حاجات كتير كده, أنا بقى كنت فاهم بحكم اني واحد منهم و عايش في مجتمعهم, (هوه ده اللي بسميه مجتمع ذكوري, مجتمع من الذكور بس)فأقدر أعرف كل التصرفات المتوقعة, و أفهم الغير متوقعة, حتى الاغتصاب و اللي أكتر منه, أيوة فيه أكتر
لكن المرادي مش قادر أفهم
يعني احنا لو كده يبقى خسارة اانا نعيش أصلاً
لو كنت رجلاً لوددت ألا أكون أصلاً
و هو ده الحال للأسف, بس الانتحار مش هيفيد, يعني نسيبهالهم؟

أنا قريت الموضوع ده من اسبوع في مدونة واحد صاحبي
http://www.maktoobblog.com/BADAWY_ELGHAD
و اتناقشنا في الموضوع ده, أنا رأيي اننا نكون مجموعة من الشباب شبكة يعني, لما حد منهم يشوف حاجة من كده يبلغ الباقيين و يروحو مش عارف أقول ايه, يحاربو
خالد الصاوي برضه اتكلم في الموضوع ده و قال حاجة زي كده
http://khaledelsawy.blogspot.com/2006/10/blog-post_28.html#links
لو مهتمة بالحوار اقري الموضوع و التعليقات

للأسف انتي مش ممكن تساعدي في اللي بقول عليه طبعاً, ولا أنا لأني مش في القاهرة, بس في الغالب هروح في عيد الأضحى عشان كده
لو مقتنعة برأيي أرجوكي تبلغيه لأي حد تعرفيه ممكن يساعد
لو شايفة انه عنف في مواجهة عنف زي المعلقين عند خالد الصاوي, هوه فعلا كده بس هنعمل ايه يعني
أكيد مش هتتحل بالحكمة و الموعظة الحسنة

 
At نوفمبر 03, 2006 1:15 ص, Blogger أميرة حسين said...

free soul
ماهو ده اللي انا بقوله من الصبح
اننا كنا فاكرين نفسنا احسن ناس في العالم و مبنبطلش هجص و كلام عن الفراعنة و حضارة النيل و مصر ام الدنيا
كنا فاكرين ان الحكومة هي اللي مجرمة و احنا ابرياء مظلومين
انما الحقيقة جت قاسية جدا و فجة جدا
انت شفت المواقع الاخبارية اللي تناولت الخبر؟ شفت تعليقات الناس عليها ؟ سواء عرب او مصريين مقيمين بالخارج؟
خلاص معدش حد هيجرؤ يقول انا مصري

خالد
انا بصراحة زيك و اكتر - يمكن لاني بنت - اتصدمت صدمة مقدرش اوصفهالك و خصوصا ان طلعت حرب و السنتر التجاري و سينما اوديون هما فسحتي الوحيدة مع صحابي من ايام الجامعة و دايما بروح هناك
اينعم مبروحش فيالعيد ، لاني اتعلمت مخرجش فيالعيد اصلا و ان كانت اسبابي تختلف
انا اصلا مبستحملش الزحام وببقى عصبية و ممكن اتخنق
لكن عمري ما فكرت ابدا ان ده ممكن يحصل ؟؟ وفين ؟؟ في وسط البلد ؟؟ وفي عيد الفطر يعني اول يوم بعد رمضان؟؟
واقدر احلفلك ان الشباب اللي عملوا كده كانوا بيصوموا رمضان و مش بعيد بيصلوا التراويح
لاننا حولنا الدين لمظاهر و نفاق ، بيصوم عشان الناس متقولش فاطر و يصلي عشان الناس تقول مبيفوتش فرض و يقرا القرآن في رمضان عشان يسابق صحابه ومين هيختم القرآن الاول
مجرد آلات تنفذ تعاليم دينية لا تفهم معناها ولا المراد بها
عشان كده كنت بقول انها بلد وسخة
سطحت كل شئ حتى الدين
لان الدين الاسلامي الحق يحضك على قول كلمة الجق ولو في وجه سلطان جائر و الساكت على الحق شيطان اخرس و اتباع حاكم ظالم و السكوت على افعاله تواطئ معه
النظام مش عايز حد يعرف الدين على اصوله ، ولا يفهم اي حاجة في اي حاجة
وخلينا ورا شيوخ التلفزيون بتوع حكم نتف الحواجب في نهار رمضان و دعاء دخول الحمام و الخروج منه

اللهم لا تؤاخذنا بما فعل السفهاء منا
حسبنا الله و نعم الوكيل

 
At نوفمبر 03, 2006 2:06 ص, Anonymous فرحات said...

با اميرة انت هنا حكمتي علي الموضوع بنظرة ومبدأ السيئة تعم بتاع امن الدولة المباركة بغض النظر عن الواقعة اللي حصلت مينفعش كل ما حاجة سلبية تحصل في مصر نقول هما دول المصريين لأ ... مينفعش كده هتعملي زي امن الدولة لما يجيله تقرير عن مواطن انه مش عاجب النظام يقوموا متهمينه انه ارهابي وبناء عليه يتم اعتقال جميع الشباب اللي في مساحة كيلو متر مربع من مسكنة ولو في قرية يبقي النطاق كل شباب القرية الساكن فيها المواطن الارهابي ... هو دا مبدأ امن الدولة في التعامل مع المصريين
وانت عملتي زي امن الدولة حكمتي علي كل المصريين بانه مش كويسسن علشان 1000 منهم غلطوا دا احنا 80 مليون
وبعدين السبب في اللي حصل معروف للجميع مش محتاج اخصائيين ولا يحزنون ومش عارف انت مش واخده بالك منه ازاي السبب في الحقيقة هو أسباب مش سبب هقولك شوية صغيريين منهم
المجتمع المصري حاليا عايش علي الكليبات والافلام من نوعيه ايناس الدغيدي وعادل امام في عمارة يعقوبيان وغيرهم من الافلام كلها بتتكلم عن ايه ؟؟؟
عن الجنس والشهوة وكيفية قضاؤها مش مهم في الحلال ولا في الحرام المهم انها تقضي وبس
والكليبات اللي مش ناقص فيها غير القبلة الساخنة ويبقي الكليب فيلم سكس
والمذيعات البرامج امثال هالة سرحان ورزان وغيرهم اللي بيجوا لابسين هدوم النوم
كل ده بيعمل خلفيات في ذهن الشباب والبنات بان هو دا الصح وهو دا الطبيعي وما غير ذلك فهو شاذ
الحاجات دي اسينما والبرامج والكليبات اللي موجودة دلوقتي بتدفع المجتمع المصري والعربي كمان الي انه هيجي اليوم اللي لما الراجل يلاقي مراته يوم الدخلة بكر يحس انها مش طبيعية اغلبية المجتمع الغربي المسيحي واليهودي
لو لاحظتي افلام السبعينات هتلاقي كلها بتتكلم عن ايه ؟؟؟
عن نصف الشعب اللي بيحارب في سيناء والنصف التاني اللي مقضيها في البارات والشقق المفروشه والدعارة ولاحظي انه مش الرجالة بس لأ والبنات والستات كمان كانوا بيقضوا شهواتهم زيهم زي الرجالة كمان
يعني المجتمع كان بوظة ولسه لحد دلوقتي بوظة وربنا يستر
الراجل بيربي بنته علي انها لما تلبس بنطلون ضيق قوي وشفاف الي حد ما .. دا طبيعي ومش حرام ولا عيب لكن لما تلبس شورت يبقي عيب ... لما تلبس جيبه مفصله جسمها ومش ناقص غير تكه وتبقي عريانه دا كويس ومش عيب ولا حرام لكن لما تكون الجيبة قصيرة يبقي عيب وحرام
المجتمع بينهار امام الثقافة الغربية والنظام المصري بيدعم الانهيار بكل قوته
في حاجة اسمها سينما نظيفة ممكن تقدم لنا فن راقي بدون مشاهد والفاظ تجرح مشاعر الشاب قبل البنت
منه شلبي في فيلم مع احمد قادم مش فاكر اسم الفيلم دلوقتي لما كانت لابسة ملابس داخلية بتعمل موسيقي كانت بتقوله اسماء القطع الداخلية دا مش بيجرح مشاعر الشباب والبنات برده ولا ايه النظام
بصراحة انا مكنتش اعرف الاسماء دي الا من منه شلبي في الفيلم
المجتمع بنهار اخلاقيا ودينيا ومحدش عاوز يحاول ينقذ المجتمع من الانهيار
غض البصر واجب وكمان الحجاب واجب لكن الاهم من دول الاثنين ان المجتمع اللي احنا عايششن فيه يعرف ان فيه حاجة اسمها ربنا واسلام ودين وحساب يوم القيامة
الناس نسوا ان فيه حاجة اسمها ربنا ... نسوا ان ربنا مراقب كل حركاتنا وافكارنا وغيره وغيره
فين ربنا من تعاملاتنا واحنا بندفع فلوس علشان ندخل سنما نتفرج علي عادل امام وهو نايم مع ممثلة بقميص النوم علي السرير
لأ وبعدين نقعد نتفرج علي هالة سرحان وهي مستضيفة عادل امام والممثلة بتاع قميص النوم وهما بيحكوا
علي المصاعب اللي قبلتهم وهما بيمثلوا الدور في الفيلم ... يا شيخة بلاش وكسة وقلة ادب
تعرفي ان التليفزيون المصري ممنوع ظهور المذيعات المحجبات علي شاشتة من عشرين سنة
الجزيرة اشهر قناة في العالم العربي فيها محجبات
تيجي بقي للنقة الاهم وهي فين رجال الدين والاخلاق
التليفزيون المصري منذ الجمهورية من خمسين سنه يعني تقدري تقوللي فين البرامج الدينية فيه .. بلاش الدينية في الربرامج اللي بتشجع الناس علي الاخلاق والقيم وعلي العلم والقدوة الحسنة
فين البرامج اللي بتستضيف علماء او استذة جامعة او طالب ناجح مثلا
المثل الاعلي الان اصبح تامر حسني ومحمد عطية وهيفاء ونانسي
قبل ما نتكلم عن الاخلاق والاحترام في الشارع لازم الاول ننظف بيوتنا من دينا الرقاصة واسطوانتها المشهورة
لازم يكون في حاجة تعرف الناس او تفكرهم بس بان في حاجة اسمها اسلام واخلاق ودين لازم نحترمه مش صلاة الجمعة وبس


بعد كل ده نبيقي نيجي نحاسب الشباب اللي تحرش بالبنات دول
علشان تبقي المحاكمة عادلة
مش نعمل زي امن الدولة المباركة
وسلميلي علي الاخلاق
والحجاب
وغض البصر

 
At نوفمبر 03, 2006 2:46 ص, Blogger أميرة حسين said...

يا فرحات كل الاسباب اللي انت بتقولها دي جايز تبرر الانحلال و الدعارة او حتى حالات الاغتصاب الفردي
انما مش ممكن ولا باضعاف اضعاف الاسباب دي تبرر الهمجية و التخلف والوقاحة اللي احنا لحد دلوقتي مش مصدقينها
ثم ان سوء احوال البلد مش مبرر
انا عارفة ان الشباب مطحون، زي ما كل الشعب المصري مطحون
ليه بنفكر في الشباب و البنات لأ ؟؟ ليه نقتل البنت لو مارست الجنس مع شاب و نبرر افعال شاب اغتصب بنت غصب عنها ؟؟
يا شيخ ده حتى البنت اللي بتغتصب بيجيبوا العيب عليها وتبقى عار و فضيحة و كأنها هي الجاني و الضحية معذور ياعيني اصله لسة شايف كليب بوس الواوا و مقدرش يمسك نفسه

زي مانت بتقول احنا 80 مليون و فيه ملايين الشباب ظروفهم مهببة لكن مش كلهم بيعمل كده ولا حتى يفكر يتحرش ببنت ولو حتى بالقول
الظروف مش مبرر يافرحات
الا لو كان الفقر مبرر للرشوة و السرقة و الاختلاس ، لو كان الضعف مبرر للتنازل عن آدميتك و عرضك و شرفك

النقطة التانية و الاهم
انا مقلتش اللي قلته عشان 1000 شاب
لأ
انا قلتها على كل اللي كان في الشارع و مفكرش غير انه يقول لا حول ولا قوة الا بالله و كأنه يعرف الله و خد بعضه و مشي
على الحكومة و النظام الفاسد اللي عتم اعلاميا على الموضوع لدرجة اني معرفتوش الا بعد اسبوع من حدوثة و مازال ناس متعرفش لحددلوقتي
على اهالي البنات اللي محرروش محاضر و مرفعوش قضايا
على الشعب المصري اللي خرج في مظاهرات ضد الدنمارك عشان رسمة كاريكاتير من سفيه وهو مش خايف لان الحكومة موافقة و محدش هيروح ورا الشمس
ومحدش فكر يخرج في مظاهرة للمطالبة بإقالة وزير الداخلية و مدير امن القاهرة و رئيس الوزراء ذاته

انما ازاي؟؟
رسمة كاركاتير تبقى اهانة للاسلام والمسلمين
انما لما يهتك عرضنا في الشوارع و محدش يحرك اصغر صباع في رجله متبقاش اهانة للاسلام
لما اختك او بنتك او مراتك تتقطع هدومها و تنتهك حرمتها و تنهار نفسيا و جسديا و معنويا ميبقاش اهانة للاسلام

ثم انك كالعادة بتبرر للجاني جريمته و تديله العذر
الحكومة بنت كلب وسخة و البلد بايظة و الافلام مسفة و الاغاني كلها عري و برامج التلفزيون تشجع على ممارسة الجنس والبنات بتلبس ضيق

يبقى عادي بقى الشباب معذور و مجراش حاجة ياجماعة
طب ما نلغي بقى عقوبة الاغتصاب و التحرش من القانون و نقول معلش الشباب معذور من اللي بيشوفه و نفتحها على البحري واللي ليه شوق في حاجة يعملها

يافرحات انا هموت من الغل الله يكرمك سيبني في حالي

 
At نوفمبر 03, 2006 7:50 م, Blogger Khaled Khalil said...

أعتقد ردك على فرحات كان فيه الكفاية
بس بصراحة انتي ظلمتيه, هوا ماقالش انهم معذورين, هو كان بيقول بس إن الموضوع متوقع مش أكتر
بس فعلاً من السذاجة اننا نقول انه منطقي أصلاً عشان نتوقعه, دي مش معاكسة ولا غيرها, دي حملة للانتهاك!! حاجة كده متتفهمش
بعدين لو هما ألف من 80 مليون في نفس المكان و نفس الوقت يبقى أكيد إن 100 مليون كانو مستعدين لو عرفو الموضوع
أنا مقدر انك فعلاً هتموتي من الغل, و ده واضح من لهجة و أسلوب عمرك ما كتبتي بيهم لدرجة اني كنت خايف أكلمك عن الموضوع ده عشان الصدمة

انتي بتقولي انك اتصدمتي عشان بنت, و طبعاً كل البنات مستهدفات و مش هتقدري تخرجي
أنا العكس, أنا صدمتي في كينونتي نفسها, أنا العكس أنا لازم أخرج لأن الوضع ده مش لازم أعترف بيه
أظن هيحصل تاني في عيد الأضحى, ان شاء الله هروح القاهرة و يكون اللي يكون
أتمنى مايحصلش حاجة, بس لو حصل أظني مش هرجع

 
At نوفمبر 04, 2006 12:05 ص, Blogger أميرة حسين said...

خالد
انا اخدت بالي من تعليقك في الشات بوكس انك كنت تقصد حاجة الموضوع ده
لكن الصدمة كانتلازم تحصل و لو مكنتش ا عرف كان لازم اعرف زي ما كل مصر لازم تعرف اللي حصل
على الاقل عشان ميتكررش
عشان اللي عملوا كده يخافوا يكرروا ده
عشان البنات تاخد حذرها
وعشان الشباب اللي زيك ياخالد وشايفين انهم يقدروا يجمعوا اعداد كبيرة منهم و يمنعوا ده لو اتكرر

بما ان الداخلية مش عايزة تتدخل و البوليس بيعيد و غرقان في الكحك
وبما انها بقت غابة فمفيش حل غير اننا نحلها كده بقى

متشكرة يا خالد على الرد لتاني مرة :)

فرحات
انا بعتذر لو كنت قاسية عليك زي ما خالد قال
:)
لكن انا فعلا كنت منفعلة جدا
وياريت تكون مقدر ده و متزعلش

 
At نوفمبر 05, 2006 1:31 ص, Anonymous فرحات said...

يا أميرة انت فهمتيني غلط .. انا مش ببرر خطأ الشباب دول
لأ
انا بس كنت بحاول اوجه غضبك اللي انت فيه ده الي تحليل شبه عقلاني للموضوع والمشكلة دي
يعني افهميني بس وكملي معايا للاخر....
احنا عرفنا ان الهياج الجنسي والمهزلة اللي حصلت في القاهرة دي عرفناها لكن دلوقتي احنا لازم نلاقي حل علشان متتكررش مرة تانية ... مش نقعد نشتم ونسب في الشعب المصري والبد ... ربنا ذكر مصر في القرآن خمس مرات في الوقت اللي مكنش في حد في مصر مسلم وقبل دخول الاسلام مصر
نقوم احنا دلوقتي نشتمها بعد ربنا ما انعم علينا بالاسلام
............
اللي حصل ده مهزلة واللي عملوا كدة ولاد كلب محدش رباهم ولو حكموني علي واحد منهم ميكفنيش اني اقعدة علي الخازوق بتاع امن الدولة ولا يكفني اني اكهربه من عضوه الحساس ل كمان انا ميكفنيش اني أقطعه ويعيش باقي حياته يتبول من أسترة مقاس واحد وعشرين
.............
انا بتألم لما بشوف أو اقرأ او اسمع عن الجنود اليهود في فلسطين وهما بينتهكوا حرمة النساء في فلسطين .... يقوم المسلم ينتهك حرمة المسلمة في بلدها في مصر ... دا شيء مينفعش السكوت عنه
وعلشان فلسطين اللي فيها يهود ومينفعش معاهم الا السلام والقتل ف اللي في مصر دول مسلمين ومصريين ومينفعش معاهم السلاح ولا القتل
لازم نلاقي طريقة تانية لحل الموضوع
وكلامي في التعليق السابق لم يكن تعاطف مع المجرمين دول
لأ
دا كان محاولة لوجود مخرج من المشكلة العويصة اللي احنا فيها
........
يا تري في حد عنده حل ؟؟؟
او يعرف مين اللي ممكن يكون عنده الحل ؟

 
At نوفمبر 05, 2006 11:29 م, Blogger أميرة حسين said...

معلش يا فرحات ، يمكن انا مفهمتش كلامك كويس :)
زي ما قلتلك انا كنت منفعلة جدا
يمكن الانفعال دلوقتي قل
لكن الاكتئاب مش عايز يروح

الحل؟؟
معرفش حد اقترح حلول الا اللي قاله خالد و قاله كمان الفنان خالد الصاوي في الوصلة اللي خالد حاططها هنا في رده الاول

مواجهة العنف بالعنف
تكوين مواجهة شعبية مادام البوليس تخلى عن دوره و مش فاضي الا للمظاهرات

لكن الحلول الجذرية لنظرة المجتمع عامة للبنت ، دي عايزالها سنين و تربية الجيل الجاي على احترام الانثى وانها انسان ميفرقش عنه حاجة
مش مجرد جسم او متعة و بس

 
At نوفمبر 07, 2006 1:52 ص, Anonymous فرحات said...

لا انت بردوا فهمتيني غلط
انا مش قصدي اننا نعلم الجيل الجديد انه يحترم الانثي
لأ
لان امريكا نفسها واوروبا مش بتحترم الانثي
ازاي ؟؟؟ اقولك ازاي
لو ليكي في الالعاب خصوصا لعبة نيد فور سبيد موست وانتد لعبة من انتاج اكبر الشركات الغربية لصناعة الالعاب وهي لعبة عربيات قصة اللعبة البطل فيها بيهدد البطل الاخر بانه هيسبقه وهياخد البنت بتاعته منه
فين الاحترام الغربي للانثي وهو بيعاملها علي انها شيء مملوك ينتقل من شخص لأخر
بلاش عندك الافلام الامريكي لو بتحبي سينما امريكي شوفي اي فلم فيه اكشن لازم تلاقي البطلة شخصيتها في الفيلم مجرد امتاع جسماني وروحاني للبطل
يبقي فين احترام الانثي
شيء بسيط تاني لو مهتمة بالشؤن الخاصة بحياة المجتمع الامريكي هتلاقي ان الامريكان عندهم العملية الجنسية دي شيء مهم والانثي ما هي الا عبارة عن شوية لحم بيستمتعوا بيه
ببساطة لو سألتي اي شاب امريكي عن اي فتاة ماشية قدامة ايه رأيك في الفتاة دي هيكون رأيه مبني من الدرجة الاولي وبنسبه 99 % علي شكل جسمها ومدي انوثتها
يبقي فين الاحترام بيقي
............
علشان نلاقي مجتمع يحترم فيه الناس جميعا بعضهم البعض بغض النظر عن نوعة ذكر ام انثي
يبقي لازم نربي نفسنا الاول وبعدين نربي اولادنا علي احترام دينا اللي هو الاسلام والمسيحية علشان نحترم نفسنا وغيرنا
لأن مينفعش ترممي الدور الخامس من العمارة وتسيبي الدور الارضي متآكل لأن النتيجة هتون فقدان الادوار الخمسة كلهم حتي بعد ترميم الدور الخامس
..........
فما بالك بالمجتمع المصري اللي هو العمارة واللي الاساس بتاعها اللي في الارض متآكل وعاوز يترمم من جديد
الاساس هو الدين والاسلام والمسيحية
..........
يا تري فهمتيني ولا لسه؟؟؟

 
At نوفمبر 08, 2006 10:16 ص, Blogger Khaled Khalil said...

بس يا فرحات أميرة مقالتش ان احترام الأمريكان للمرأة أكتر من عندنا ولا أقل
بعدين أنا متفق معاك 234% ان الثقافة الأمريكية الاستهلاكية (اللي بناخدها منهم باقتدار) من أسسها عدم احترام أي شيء بما في ذلك العلاقة بين الرجل و المرأة, و ده زي ما قلت في الأفلام و اللعب, و أضيف في الاعلانات, أكتر حاجة اتنقلتلنا بسلبيتها
لكن ده ميمنعش ان التحرش هناك أقل بكتير من هنا
لدرجة انك لو جاي من أي مكان في العالم هتروح شركة سياحة أو تجيب دليل عن مصر لازم هيقولك تاخد بالك كويس جداً لو معاك أي بنت عشان المعاكسات, و يقولو للبنات لو اتعاكسو يتصرفو ازاي

انتا بتقول لازم نربي نفسنا و ولادنا على احترام الدين
و ده يتضمن اللي أميرة قالته عن تربية جيل جديد يحترم الأنثى
بس المشكلة كبيرة جداً

فاقد الشيء لا يعطيه
و لا يتعاطاه

 
At نوفمبر 10, 2006 1:54 ص, Anonymous فرحات said...

ايوة يا خالد بيه انت جيت علي المكان اللي انا عاوزه وحطيت رجلك
.........
عارف يا خالد انت كل ما اشوف اسمك افتكر ضابط امن الدولة اللي اعرفه
اسمه خالد بيه
ربنا يستر
...............
النقطة اللي وصلت ليها يا خالد دلوقتي
وهي فاقد الشيء لا يعطيه ولا يتعاطاه
احنا لازم نغير المجتمع اللي احنا عايشين فيه
اتكلم يا خالد ووعي كل اللي تعرفهم
ابدأ باصدقائك ومعارفك وكل اللي بتثق فيهم وعارفهم من زمان وعرفهم اهمية اننا نكون شعب متحضر عرفهم ان كلمة المصريين شعب فرعوني مايمشيش الا بالكرباج دي كلمة غلط
وعارفهم ان المصريين اعظم من كده
لازم نعرفهم ان الحزب الوطني ده عبارة عن طفيله عايمة علي سطح المياة
عارفهم ان الشعب المصري عبارة عن مياة نقية بها بعض الشوائب الموجودة في كل مجتمع حتي ايام الرسول والمسيح
عارفهم كمان ان المياة دي عليه طبقة من الطفيليات والقازورات اسمها مبارك واعوانه من الحزب الوطني لكن المياة نظيفة
لازم هيجي اليوم اللي الطفيليات دي هتموت وتعفن والتيار يخدها بعيد عننا
.............
يا جماعة عاوزين نبني اساس للبلد علشان ولادنا يعيشوا في بلد كويس
:::::::::::
انا جتلي الفرصة اني اتجوز واعيش في المانيا السنة اللي فاتت من فتاة المانية ولكني تراجعت في اخر لحظة
بصراحة لحد الان مش عارف تراجعت ليه مع العلم اني كنت بلاقي تشجيع كبير بطريقة ضخمة اني اسافر المانيا واتجوز الالمانية
اللي كانوا بيساندوني في السفر كرهوا مصر علشان الاوضاع اللي احنا فيها
لكن لما فقت من موضوع السفر والحمد لله استقريت عاطفيا في مصر
فكرت وقلت لنفسي لو جت نفس الفرصة لابني انه يسافر اي بلد تاني غير مصر ويتجوز ويعيش طول عمره هناك يبقي موقفي انا ايه؟؟
ابني لو اتربي في مصر اللي انا اتربيت فيها اكيد هو كمان هيسافر بره مصر ومش هيرجع زي ما انا كنت عاوز اعمل
بس انا تراجعت ومعرفش ابني هيتراجع زيي ولا لأ
علشان كده عاوز ابني وبنتي يتربوا في بلد كويس ومجتمع يحترمهم ويحس بيهم
مش عاوز ولادي يتربوا في عهد الرشاوي والوسطات وخلافة
...........
بدل ما ابني يسافر المانيا علشان الديمقراطية اللي هناك
انا لازم اجيبله المانيا لحد عنده هنا في مصر
...........
يا تري في حد فهمني؟؟؟؟؟

 
At نوفمبر 10, 2006 6:55 ص, Blogger Khaled Khalil said...

أيوه فاهمك و هارشك, مانتا عارف, أصلي ظابط أمن دولة متنكر في شكل انسان

اللي انتا مش فاهمه, إني لو أقصد فاقد الشيء على المجتمع, ... فأنا منه
يعني بالنسبة لموضوع الهجرة, كنت معارضه تماماً و أنا صغير في المدرسة, كنت وطني متحمس, لكن دلوقتي, غير موضوع الوطنية, أنا عايز أهرب, مش لازم للأحسن, بس عايز أهرب, يعني حتى لو في أفقر بلد في لأفريقيا, بس أبعد عن هنا, أنا مش صعبان عليا غير اني أسيب الناس اللي أعرفهم
و انتا بتقولي أغير البلد, ... كنت غيرت نفسي

 
At نوفمبر 10, 2006 9:17 م, Blogger Khaled Khalil said...

على بالي .. على بالي .. حبيبي على بالي
على بالي .. على بالي .. ابن بلدي على بالي
و على بالي .. على بالي .. حبيبي على بالي
على بالي .. على بالي .. ابن بلدي على بالي

لا يا مصري لا و لا .. لا و ألف لا
تهجر بلدك و تسيبنا .. بلدك بيك أولى
لا يا مصرى لا لا .. لا و ألف لا..

ليه تهجرنا و قلبك يقسى .. ليه تبعد و حبايبك تنسى ليه
يا ابن بلدى ليه .. آه..آه
فين الجواب فين الرسالة .. هاتبعتهم قوام .. قوام
نسيت هوانا و بعته ....
على بالي .. على بالي .. حبيبي على بالي
على بالي .. على بالي .. ابن بلدي على بالي


فين تلاقي الضحكة الحلوة .. ضحكة من القلب و العين سوا
فين تلاقي العيون السودة .. جمالهم غنوة و الكلام عنهم حقيقة
على بالي .. على بالي .. حبيبي على بالي
على بالي .. على بالي .. ابن بلدي على بالي

مين يصحى فى الفجر يأدنلك .. قوم يا مؤمن قوم و اشكر ربك
آة .. آة
مين فى المحنة يقف جنبك .. و يقولك ربك بكره يعدلها فى أوانها
لا يا مصري لا و لا .. لا و ألف لا
تهجر بلدك و تسيبنا .. بلدك بيك أولى
لا يا مصري لا لا .. لا و ألف لا..

على بالي .. على بالي .. حبيبي على بالي
على بالي .. على بالي .. ابن بلدي على بالي
و على بالي .. على بالي .. حبيبي على بالي
على بالي .. على بالي .. ابن بلدي على بالي

 
At نوفمبر 11, 2006 7:07 ص, Blogger Khaled Khalil said...

سلامو عليكو, ازيك يا أميرة
في جماعة بنات عملو الأسبوع ده بلوج مشترك بيعبرو فيه عن آرائهم, لو تحبي تشوفيه صوتها
بالمناسبة هما معندهمش أي مانع في مشاركة ناس جداد في البلوج, بس انتي عرفيهم لو عايزة
أنا عرفت الموضوع في المناقشة دي

 
At نوفمبر 12, 2006 8:42 م, Blogger Khaled Khalil said...

لسه الأغاني محاصراني
اللي فاتت كانت عايدة الأيوبي
المرادي كاميليا جبران, شعر محمود درويش

عن الأمنيات

لا تقل لي ليتني
بائع خبز في الجزائر
لليغني لليغني, مع ثائر

لا تقل لي ليتني
راعي مواش في اليمن
لليغني لليغني, لانتفاضات الزمن

لا تقل لي ليتني
عامل مقهى في هفانا
لليغني لليغني, لانتصارات الحزانى

لا تقل لي ليتني
أعمل في أسوان
حمالا صغير لليغني للصخور
حمالا صغير لليغني للصخور

يا صديقي لن يصب النيل في الفولجا
ولا الكونغو، ولا الأردن، في نهر الفرات
ولا الكونغو، ولا الأردن، في نهر الفرات
كل نهر، وله نبع.. ومجرى.. وحياة
كل نهر، وله نبع.. ومجرى.. وحياة
يا صديقي.. أرضنا ليست بعاقر
يا صديقي.. أرضنا ليست بعاقر
يا صديقي.. أرضنا ليست بعاقر
كل أرض، و لها ميلادها
كل أرض، و لها ميلادها
كل فجر، و له موعد ثائر

 
At نوفمبر 12, 2006 8:44 م, Blogger Khaled Khalil said...

بس انتي يا أميرة رحتي فين ؟
لا تكوني خلاص هاجرتي
بذمتك تقدري تسيبي بطوطة ؟
ولا أخدتيها معاكي ؟

 
At نوفمبر 12, 2006 10:14 م, Blogger أميرة حسين said...

لسة مهارجتش يا خالد
ومعتقدش اني هاهاجر :) الظاهر اننا مربوطين بالارض دي
معمول لنا عمل عشان نحبها
:)
بس بجد مكتئبة جدا و مليش نفس بصراحة اكتب ولا حرف
انا قلت بس ارد هنا عشان الحقيقة فيه ناس كتير سألت عليا اليومين اللي فاتوا دول
انا كويسة و كله تمام :)

بس مش عارفة اكتب حاجة دلوقتي
الاكتئاب محاصرني

 
At نوفمبر 14, 2006 1:15 ص, Blogger Khaled Khalil said...

طب بلاش تكتبي
اقري
في هناك مجتمع بيتكلم ادخلي معاهام و ناقشيهم, بس متستسلميش للاكتآب
الاكتآب هيزيد كده



معلش أصلي لسه متعلم أعمل لينكات و فرحان بكده

 
At نوفمبر 14, 2006 10:44 م, Blogger أميرة حسين said...

طب ما تعلمني يا عم خالد و منكم نستفيد
:D
html أكيد فيه كود
اصل انا مبفهمش في البطيخ ده خالص
:D

انا هاروح اللينك اللي انت حاطه اهه
لما نشوف يا عم المجتمع اللي بتقول عليه ده
:)

 
At نوفمبر 15, 2006 12:03 ص, Blogger Khaled Khalil said...

أنا بقى مابافهمش غير في البطيخ


جربي كده

<a href=http://amerahuseen.blogspot.com/>أميرة حسين</a>

 
At نوفمبر 16, 2006 2:02 ص, Anonymous فرحات said...

بس خلوا بالكوا
البطيخ بتاع السنة دي
مسمم
ولو متسممتش
هيعملك اسهال
يعني ممكن تعمل احتياطياتك
انا حذرتكم وانتم احرار
ممكن تستعينوا بالبامبرز بتاع بطوط الجميلة

 
At نوفمبر 16, 2006 9:24 ص, Blogger Khaled Khalil said...

السنادي كمان مسمم ؟
بس ده عندكو في القاهرة, للأسف بطيخنا مش مسمم, آديني بسه عايش
أصل بعيد عنك أنا لازم أجرب بطيخة من كل اتنين من انتاج البلد
لو لسه عندكو بطيخ يا ريت تبعتلي بطيخطين مسممتين في جواب مستعجل

 
At نوفمبر 16, 2006 8:39 م, Blogger Amenhotep®© said...

من الواضح أن المرأة في مصر بقت أقل من الحيوانات اللي ممكن تمشي براحتها من غير مضايقة.لأ و بعد كل ده هي اللي غلطانة علشان فكرت تلبس براحتها و متنافقش المجتمع القذر اللي بيحكم بالمظاهر و زي ما أميرة قالت لما البنات ما عندهومش دين خلوا عندكوا انتم دين.بتتكلوا عن الأنحلال في الغرب و مفيش منحلين و منافقين أكثر منكم

 
At نوفمبر 16, 2006 9:50 م, Blogger khalakhelo said...

إحنا ؟
:(

 
At نوفمبر 16, 2006 11:11 م, Blogger أميرة حسين said...

ولا يهمك يا فرحات ماحنا كل حاجة بناكلها ولا بنشربها - حتى مية الحنفية - مسممة و متنيلة بنيلة
هي جت ع البطيخ ؟؟
:)
كل يا عم ولا يهمك

ابقى فكرني يا خالاخيلو ابعتلك كام راس بطيخ معتبر من القاهرة :)

فرعون
ماهو المجتمع ده اساسه النفاق يا فرعون في اي حاجة حتى في الدين
الواحد يبقى قايم من الصلاة و تعدي بنت حلوة يقعد يبحلق و مفيش مانع من كلمتين رخمين مالهمش لازمة
والله الواحد بقى يمشي في الشارع و عنيه في وسط راسه

وانت اخدت الكلام على نفسك ليه يا خالاخيلو :D
احنا عارفين ياعم انك غلبان و مالكش في البطيخ بتاع المعاكسات ده
متزعلش اوي كده

 
At نوفمبر 17, 2006 10:52 ص, Blogger Khaled Khalil said...

طيب يا أميرة, انتي لسه ماهجرتيش
بس اعتزلتي الكتابة مش كده ؟

 
At نوفمبر 17, 2006 10:20 م, Blogger أميرة حسين said...

لأ مبطلتش كتابة طبعا يا خالد
ولا اعتزلت ولا حاجة
كل الحكاية اني حاليا مليش نفس اكتب
انما متقلقش انا راجعة قريب :)
انا معرفش اعمل حاجة في حياتي يا خالد غير اني اقرا و اكتب
:)

 
At نوفمبر 18, 2006 10:51 ص, Anonymous غير معرف said...

انا رديت كتير في معظم المدونات اللي ناقشت موضوع وسط البلد
لكن في كل مدونة تركت عليقا طويل كالمقال
لكن اسمحيلي انا مش هقول رأيي في اللي حصل
لاني قولته ولسة هقوله كتير اوي
لكن ما دفعني للضغط على ازرار لوحة الكتابة الآن هو وصفك لمصر بانها بلد وسخة ودعوتك للهجرة منها
اسمحيلي مع كل احترامي لكي وانا لا اعرفك بس اعتدت ان احترم الاخر
واعلم انك معذورة لان الامر ليس هينا
اسمحيلي اقولك ان العيب مش في البلد
البلد ديه بردو بنيلها اللي بقى مصرف صحي ومحيط للأوبئة والأمراض ...هيا اللي خرجت ناس دفعوا حياتهم ثمن عشان انا وانتي وغيرنا يعيشوا النهاردة
بغض النظر عن اننا موتى مش احياء
في ظل النظام الحاكم
لكن البلد ماعليها ذنب ولا عيب
العيب الشعب
البلد اكرم من اننا نهين ذرة تراب واحدة منها
عارف انك هتقولي بلاش تعيش دور الوطني
لكن مايمنعش اني انا بحب الوطن ده وان انتي كمان بتحبيه والا ماكنتيش تخافي عليه وعلى مايصيبه من كوارث
قولتي نهاحر من البلد وده هروب من مشاكلنا
ونسيبها لمين ونمشي
ونلاقي فين بلد زيها
سيبك من كل اللي بيحصل فيها
لو انتي شايفة انك هتعرفي تعيشي في بلد غيرها
سبيها
بس هتبقي هربتي من المشاركة
وده هيصور للبعض انك مش حمل المسئولية
لو كل واحد فكر زيك وساب البلد
يبقى هنبص تاني يوم نلاقي اعدائنا بينعموا بخيرها واحنا هنرجعلها تاني والله بس المرة هنرجعلها مذلولين بندفع بالعملة الصعبة عشان نعيش فيها.

موضوع التحرش الجنسي قديم يا استاذة اميرة
بس تطور وهو زي الفيروس
بينتشر ويتطور
لحد ما قرب يقضي على عصب الأمة ويدمر خلاياها وفئاتها
لو كلنا ما وقفناش ايد واحدة ونطالب بالحق
وما نسكتش عن الحق ولا عن واحد بيعاكس قدام عنينا ونسكت ونقول احنا مالنا
صدقوني
لو حصل كده وكلنا سكتنا
ماحدش هيبقى آمن في بيته
ومحتمل اي حد يتهجم على اي انسان في اي وقت شاء ويعمل اللي عاوزه
شكرا انك اتحتي لي الفرصة اترك تعليقي

مهـــــــــــــند

 
At نوفمبر 18, 2006 6:45 م, Blogger أميرة حسين said...

اولا يا مهند شرفت البلوج و بجد انا سعيدة بتعليقك جدا

انا طبعا بحب البلد دي جدا يا مهند و معرفش حتة غيرها اقدر اعيش فيها :) :)
كلنا كده
لكن الموضوع كان مستفز بالنسبة لي لاقصى درجة
انا عارفة ان موضوع التحرش قديم وانا شخصيا اتعرضت ليه زي كل البنات مرة واحدة على الاقل
لكن مكمنش كده يا مهند
وبعدين الوطن هو ايه ؟؟
مش الناس اللي عايشة فيه
احنا عمالين نقول البلد بايظة و الحكم مهبب انما لما اجي الاقي الناس نفسها هي اللي بتعمل كده

بصراحة يا مهند فقدت اعصابي بجد
و على كل حال انا اعتذرت في بداية البوست قبل ما اقول ولا كلمة لاني كنت متأكدة اني هفقد اعصابي و يمكن اخرف كمان
:)

شكرا مرة تانية على ردك يا مهند
ويارب متكونش اخر مرة تعدي فيها على المدونة

 
At نوفمبر 19, 2006 6:14 ص, Anonymous غير معرف said...

شكرا ليكي يا استاذة أميرة على ردك
وعلى اعتذارك كمان وهو اعتذار للبلد ديه مش للشعب ده
ولكي العذر في اللي قولتي
نحن نعلم ان المصيبة كبيرة
وهي مش مشكلة بنت ولااتنين اتحرشوا بيهم شوية رعاع نخجل ان نسميهم آدميين ونظلم الحيوانات اذا سميناهم حيوانات
, انما مشكلة مواطن ...مشكلة فقد المواطن الشعور بالأمن والسلام في بلده
انه يبقى ماشي قلقان على نفسه
وان البنت تمشي مترقبة ومتوقعه تعرضها للتحرش وربما الاغتصاب بين الحين والأخر
ان المشكلة هيا مشكلة عدم شعورنا بالانتماء للبلد لاننا فقدنا الامان فيها
وبالتالي هنفقد حبنا واحترامنا لشعبها واكيد احنا فقدنا احترامنا لحكومتها من زمان
وزي ما قولتي في البداية وادي الشعب كمان
لكن مش كل الشعب
لسة الدنيا بخير
وان قل هذا الخير
لكن لسة عندنا حاجة نبكي عليها
وهيا مصر نفسها


للأسف ماعنديش كلام كتير اقوله لأني بقالي كتير بتكلم من وقت الحادثة لحد النهاردة
بس عندي أمل اننا نحول الكلام لفعل ونبتدي حملة مكافحة الآفات المجتمعية والسرطانات الأخلاقية
بس حبيت اشكرك واقولك ان شاء الله مش هتكون اخر مرة اترك تعليق في مدونتك
وربنا يستر على مصر

حفظكم الله

مهـــــــــند

 
At نوفمبر 19, 2006 12:51 م, Blogger Khaled Khalil said...

بص بقى يا عم مهند, أنا واحد فقد وطنيته من بتاع 6 سنين و بلا رجعة, أيوة زي مابتقول كده, معنديش انتماء, القضية بالنسبالي مش البلد كاهاني فأسيبها, أنا أشاساً عارف إن موضوع الوطن ده تقريباً أكبر اشتغالة البشرية اشتغلت نفسها بيها, في البداية كانت مسألة قرى قريبة من بعضها تفصلها عن العالم تخوم فبقى لهم وحدة ثقافية من السفر و كده بعدين بقى لهم حاكم من مصلحته الشخصية إن حكمه يفضل موجود مستقل بذاته و يا سلام لو كبره, ده باختصار شديد
نرجع بقى لو البلد كرهتك, هو احنا نقصد ايه بالبلد النيل اللي طافح مجاري زي مانتا لسة قايل
فكرتني بحارتنا زينة المجاري في وسطها نهر جاري لبيرم الله يرحمه, ولا تقصد القطره اللي ماشيا تخبط في بعضها والله عمار يا مصر, ولا حكومة همها الشاغل تحافظ على الحكم في ايدها بأقذر الطرق, ولا ليكون قصدك الأهرام الكبيرة اللي بناها أجداد أجداد أجداد الناس اللي موجودين دلوقتي و يا دوبك يعرفو يعملو حيطة, كان أولى الأجداد يفخرو بالأحفاد لكن العكس ملوش أي معنى
طبعاً تقصد الشعب اللي عايش على الأرض اللي بنسميها مصر, أهه الشعب قدامك شوف بقى ازاي
طبعاً مش كله, لكن لما فيه ناس عملت كده في وسط البلد, يبقو مش خايفين من حاجة, يبقوا عارفين ان نسبتهم من الشعب كبيرة
أنا عن نفسي ضد الهروب, مش لأن البلد دي أحسن من غيرها, يمكن العكس, لأني واحد من الناس دول و لازم أغيرها, و كلنا منهم و لازم نغير أخلاق الشعب
على أي حال انتا وصلت للمضمون
عايز تحول الكلام لفعل و تعمل حملة مكافحة الآفات الأخلاقية
طب ازاي ؟
نربي ولادنا على احترام الأنثى و الكلام ده
طب ازاي ؟
و بعدين مانتا مش لوحدك, لسه في ناس مش بتربي ولادها, هتربيهم غصب عنهم ؟
طب و اللي موجودين دلوقتي اللي لاهم حيوانا ولا عايزين نعترف انهم بشر دول, نعمل فيهم ايه ؟
احنا ولا الحكومة ؟
طب لو الحكومة معملتش حاجة, أو لو كانت مستفيدة من ناحية ما, ايه العمل ؟
عايزين نشوف آراء لحل المشكلة

 
At نوفمبر 22, 2006 2:35 م, Blogger maged stephen said...

حاولى تخلى حد بيفهم يبقى يشرح لك الفرق بين الانسان الانفعالى والانسان المبادر
عشان عمرى كله مش كفاية عشان أوصله لكل مصرى
كل اللى يعرفه أنه يشتم بلده ويستّعر من أنه مصرى
ملأتى نفسى بقدر من الحزن بالاضافة لما به أصلا
لا أعرفك ولكنى حزين عليك فعلا
حقيقى
زين ما خللفتى يا مصر
أخيرا
ربنا يسامحك

 
At نوفمبر 22, 2006 10:53 م, Blogger أميرة حسين said...

ربنا يسامحنا كلنا يا ماجد
:)
مش عايزة اكرر كلام قلته كتير
يا ريت لو تقرا التعليقات بالمرة توفر عليا كتير

و هحاول ادور على بيفهم ولو انه صعب يعني

 
At يونيو 14, 2007 10:46 ص, Anonymous غير معرف said...

سید اولاد پیغمبر اسلام = سنده اولاد شیطان

سید اولاد زهرا بنت رسول = فضله نجس شیطان در خاک پاک ایران.

سنده موجودات در حلقوم فاطمه زهرای بنت رسول الله

کیر سید مجهول تو کس خو کون خواهر و مادر سید اولاد پیامبر اسلام

سنده ملت جهان تو کس و حلق خواهر و مادر مداحان و روضه خوانان خاندان محمد رسول الله

 
At ديسمبر 07, 2007 7:54 ص, Blogger Spider Man said...

أنا معاكى فى كل كلمه قولتيها تماما لكن انا شايف من البروفايل بتاعك عيوب وأخطاء رهيبه فى شخصيتك وفيه حاجه جميله فى الموضوع لما تكتبى عن حاجه لازم تهدى عشان تقيمى الموقف صح لكن انا شايف نرفزه وألفاظ بذيئه وكلام كتير وتعصب لجنسك واضح بطريقه غبيه انك جايه على الشباب انا لما قريت البروفايل قولت مشاء الله على الثقافه بعدين اتصدمت لكن انا مش ضدك فى كلمه على فكره الشباب دول لو فى دوله محترمه هيتعدمو فى نفس المكان الى اغتصبو فيه البنت وده مكتوب فى الدستور على فكره الدستور المصرى مع بعض الإسثنائات ناس كتير اعترضت عليها وبجد بعد مكنت معاكى فى الحوار حسيت برده بتعصب لجنسى يعنى بجد مع احترامى قولت كده يعنى يا بنت اللذينه انتى تقولى لو ماشيه بمايوه تبص فى الارض صح وده الى بيحصل انا هعمل كده ناس كتير هتعمل كده لكن فيه ناس ايمانهم ضعيف وربنا عارف كده عشان كده بيسموه مجتمع شرقى يا اختى يا ريت اكون كلامى مفهوم من الجميع وربنا مش هقول ينتقم منها دوله لأنى بحب مصر جدا اكتر مما تتخيلو لكن بكره الفساد الى فيها طبعا طبعا انا مقلتش حاجه من الى عايز اقوله لو هتكلم هكتب اكتر من الى كتبتيه والله يعنى بجد فعلا مش قادر استحمل ولا اتخيل ازاى حصل كده ومحدش اتجرأ انه يحوش ده وكتاب الله الواحد لو هيمو وهيتفرم مهيسيب حاجه زى دى تحصل فين الرجاله يا مصر وعلى رأيى أصحابى قربو ينقرضو مهما ماتو فى 67

إسلام

 
At ديسمبر 07, 2007 8:02 ص, Blogger Spider Man said...

ورجاء اخير اهدى شويه على الشباب لو فيه الف منحرفين فيه20 ميلون محترمين مش هقولك بيصلو وبيعملو اصل الاحترام حاجه والتدين حاجه تانيه والى ربنا انعم عليه بالاتنين يا بخته عند الله

انتى فهمانى مش عشان فيه قله منحرفه يبقى كل الشباب ولاد كلب وكلهم عايزين الحرق وبتاع انا الى مستغربله مفيش شاب النخوه خدته وعمل حاجه ده العجيب فى الموضوع والله لو كل الشباب من عينة روك يعنى اكيد فيه نخوه ولا خايفين على الهدوم الجديده ولا ايه مش عارف المهم انى فى حد ذاتى من وانا عندى 18 سنه انحرفنت شويه لكن بينى وبين نفسى يعنى الى بيشوفنى او يعرفنى بيحلف بادبى انما بقيت مع اصحابى فيه شقه فاضيه بقينا نشرب حشيش وحاجات تانيه كتير والله غفور رحيم يعنى لكن الحمد لله وعلى فكره الانحراف ده بعد تدين رهيب والله من ساعة معرفت الدنيا وانا مبسبش فرض عند 18 سنه الله اعلم بقه ايمانى اتهز ايه الى حصل يلا اهو وقت وراح لحالو بس الحمد لله عشان كده متخليش شاب لما يقرا الموضوع يحس انه مدايق انه منتمى لفصيلة الكلاب الى عملت كده فاهمه قصدى وكل احترامى ليكى يا انسه لوليتا

 
At ديسمبر 07, 2007 8:12 ص, Blogger Spider Man said...

أزال المؤلف هذا التعليق.

 
At ديسمبر 07, 2007 8:13 ص, Blogger Spider Man said...

وعلى فكره كمان زى الأستاذ فرحات مقال مع احترامى لكل الناس الأسباب الى قالها حقيقه ولكنها مش كفايه عشان شاب يعمل كده فى الشارع انتى مين قالك انه مش شارب حاجه مثلا انتى متعرفيش احساس الى شارب ده اه الموضوع واكل دماغه وكده شرب حاجه مع اصحابه او هاش او حشيش ولا حاجه وقام عامل كده مهو برده فى الاول وفى الاخر مذنب ليه تشرب منكر فى الاول وفى الاخر لكن ممكن يكون اتنين غلابه لا بايديهم ولا برجليهم واصحابهم ولاد كلب رخمين وقفشو فيهم ومش هجكيلك على الشيطان قامو شربو معاهم وادرمغو شافو البنيه اتهبلو مثلا ارجوكى تبصى لكل ناحيه فى الموضوع لانك شخصيه غريبه احبها جدا فى الحوار لانى عمرى مقلت نظريه ومأثبتش صحتها لكلنك بجد فى الحياة عنيده وناشفه بطريقه تثير الغيظ ولكن مهما كان مش عيب انك شخصيتك تكون مستقله وربنا يوفقك يا رب على المقال واهتمامك بالموضوع

 
At ديسمبر 08, 2007 11:03 ص, Blogger أميرة حسين said...

اسلام :
بصراحة لما شفت ردودك دي استغربت جدا لان الموضوع بقاله اكتر من سنة، لكن توضيحا للامر فقط لا غير
انا مجمعتش كل الشباب ، انا جمعت كل الشباب اللي كان في المكان ده وقت الحادث واعتقد ان فيه فرق كبير جدا

ثانيا انا برضه اتكلمت عن الناس عموما - شباب و بنات و رجالة و ستات - اللي بيحملوا البنات الخطأ كله حتى لو انها مرتكبتش اي خطا
نظرة المجتمع الشرقي المعتادة اللي حتى بتشوفها في الافلام و المسلسلات لانها اصبحت الاعتقاد السائد بدون ادنى محاولة لمناقشتها
اللي هي لو ايه مصري - راجل بقى ولا ست -سمع ان لو فيه بنت تعرضت للاغتصاب او التحرش يبقى اول حاجة هيقولها ، ماهي هتلاقيها لابسة محزق لا عريان ولا راجعة اخر الليل
ونسيب اصل المشكلة والجاني في القضية و نقعد ندور على مبرر و عذر يرمي الخطأ على الضحية . اعتقد ان ده كل اللي انا قلته سواء في البوست او في التعليقات :)
شكرا على اهتمامك يا اسلام.

حاجة بقى بره الموضوع
ياريت اللي حط التعليق ده يقولي معناه ايه الله يكرمكوا :) اوعى تكون شتيمه ولا حاجة

( سید اولاد پیغمبر اسلام = سنده اولاد شیطان

سید اولاد زهرا بنت رسول = فضله نجس شیطان در خاک پاک ایران.

سنده موجودات در حلقوم فاطمه زهرای بنت رسول الله

کیر سید مجهول تو کس خو کون خواهر و مادر سید اولاد پیامبر اسلام

سنده ملت جهان تو کس و حلق خواهر و مادر مداحان و روضه خوانان خاندان محمد رسول الله)

عليه الصلاة و السلام يا سيدي :)

 
At ديسمبر 22, 2007 9:24 م, Blogger Spider Man said...

انا معاكى وربنا يشهد على كده لكن انا متأكد جدا جدا وانا على فكره مش من النوع الى بيقول كلام اهوج انا متأكد ان مفيش شاب فى الدنيا يقدر يغتصب فتاة مستحيل ده امر مستحيل ومفروغ منه وبما انى مكنتش شاهد على الموضوع ده مش هعد افتى كتير لكن محدش فى الدنيا كلها يقدر او ينفع اساسا انه يغتصب بنت بغير رغبتها مش هتكلم على الرغبه عشان هتقوليلى يعنى انت عايز تفهمنى انها كانت عايزه كده فى الشارع ده مش موضوع وزى مبقولك منا مكنتش موجود يمكن كانو خمسه سته مثلا هتعمل ايه المسكينه وربنا يحفظ بنات المسلمين اجمعين يا رب العالمين قولى امين وشكرا لإهتمامك بالرد

 
At ديسمبر 24, 2007 1:08 ص, Blogger Spider Man said...

من الواضح أن المرأة في مصر بقت أقل من الحيوانات اللي ممكن تمشي براحتها من غير مضايقة.لأ و بعد كل ده هي اللي غلطانة علشان فكرت تلبس براحتها و متنافقش المجتمع القذر اللي بيحكم بالمظاهر و زي ما أميرة قالت لما البنات ما عندهومش دين خلوا عندكوا انتم دين.بتتكلوا عن الأنحلال في الغرب و مفيش منحلين و منافقين أكثر منكم

الشخصيه الى كتبت الكلام ده تفتقر لكل متطلبات التفكير مهو احنا عشان نفكر لازم يبقى عندنا عقل ومخ مش معقول يبقى واحد معندوش عقل اساسا وندربه على التفكير ونحاول نعلمه يا بنى ادمه انتى واسف عشان انا اساس متنرفز هقول كلام جارح فيه حاجه اسمها لو هيا معندها دين وماشيه براحتها خلى انتو عندكو دين طيب مهو زى مهيا معندهاش دين هما كمان معندهمش دين متخلوش المشكله متعلقه بجنس وجنس اثم وجنس مسكين ومكسور الجناح هنا فيه ولاد كلب وهنا فيه ولاد ستين كلب انا على فكره فيه كلام كتير لكن اختصرت عشان ورايا حاجات اعملها

 
At فبراير 13, 2008 4:01 ص, Anonymous عمر خالد said...

ربنا زي ما أمرها تتحجب أمرك لو شفتها لابسة بكيني في الشارع تبص في الأرض !!!0

ردا على هذه الجملة انتى مخطئة لانه لايمكنك منع جائع من تناول طعام وضعتيه بيديك امامه هذا من ناحية
ممن ناحية اخرى عند مناقشتك لموضوع تكلمى بروية حتى تقنعى من يتلقى منك
انا لا انكر خطأ الشباب لكنهم تحت ضغط لا تنسى هذا
و راى الشخصى فيما حدث هو ناتج عن خطأ فى المجتمع فكل من الشاب و الفتاة عليهم ذات الضغط و العبء و ارجو الا اكون اطلت عليكى

عمر خالد
المدونة
loveoflovers.blogspot.com

 
At يوليو 26, 2012 2:18 م, Anonymous Entrümpelung wien said...

Dank den Themen .... Ich hoffe, mehr von den Themen

 
At أغسطس 05, 2012 2:29 م, Anonymous Umzug Wien said...

Vielen Dank .. Und ich hoffe, Sie Mved Entwicklung und Schreiben von verschiedenen Themen :)

 
At أبريل 21, 2013 10:09 ص, Anonymous Wohnungsräumung wien said...

تسلم ايديك على الموضوع الممتاز
Wohnungsräumung
Wohnungsräumung
Wohnungsräumung wien
Wohnungsräumung wien
Wohnungsräumung wein

 
At مايو 01, 2013 10:20 ص, Anonymous ريوبى said...

موضوع ممتاز
ryobi

 
At يوليو 27, 2013 3:16 م, Anonymous Wohnungsräumung said...

شكرا على الموضوع المتميز
Dank Thema Wohnungsräumung

 

إرسال تعليق

Links to this post:

إنشاء رابط

<< Home